«Ull er eit heilt fantastisk materiale ... du kan laga kva som helst!!» - Anne Johnsen
Det er andre gong Ullveka presenterer ein Ullveke-utstillar, og i år har vi ei retrospektiv framsyning av arbeida til Anne Johnsen, filtmakar busett på Holmeknappen i gamle Meland kommune, no Alver.
Dei fleste forbinder nok Anne Johnsen med Galleri Rustica som ho driv saman med ektemannen Leif Johnsen, men det er nok med hendene i ulla ho trivs best. Anne har ein brei og samansett produksjon av både bilder og bruksgjenstandar. Ho har jobba med fleire ulike tekstile teknikkar som spinning, veving, strikking og hekling. Men det var filtinga som tok ho for alvor tidlig på 1990-talet og som ho framleis jobbar med.
Anne har eit roleg vesen som ein kan sjå att i arbeida hennar. Streken er vàr og fargane avstemte. I dei mest «teikneriske» bileta leikar ho med det naturalistiske opp mot det abstraherte – kor lite strek treng auge for å sjå eit dyr eller ein menneskeskikkelse? Ho har stått mykje og leika seg med svart «ullstrek» på eit kvitt «ullark». Ho har lagt på. Gått ifrå. Kanskje satt på litt kaffi – gjort andre ting – så kommen tilbake med eit friskare blikk som kunne justera streken til å gje bilde meir liv eller betre proposjon og komposisjon.
I tillegg til bilder har ho og produsert ei mengd småplagg og vesker, ullkjede og skjerf. Ullprodukt til glede, varme og nytte.
Verkstaden har ho hatt i huset, anten på kjøkkenet eller nede på eit rom i kjellaren. Trass i redusert helse jobber Anne framleis med filtinga. Det gir henne glede og ro.
Ho har jobba mykje for å fremje andre handverkarar og kunstnarar gjennom galleridrift. Det starta i «Sareptas krukke», eit lite galleri i “Sjursehuset” tvers over vegen for ungdomsskulen på Frekhaug med minikafe til glede for både tilreisande og lokale. Sidan i Galleri Rustica heime på tunet på Holmeknappen på Holsnøy. Ho og ektemannen Leif Johnsen renoverte den gamle løa si og omgjorde det til galleriet som opna i 2006 med Anne sin utstilling «Alt i ull».
Det har blitt mange ulike typer arbeider iløpet av tida ho har vore aktiv som filtmakar, og dei er godt spreia utover landet. I Ullveka får du sjå ei samling av arbeider frå ulike periodar, både bileter og bruksting. Det aller meste er i privat eige og blir lånt ut til utstillinga.
